A Heuschreck mit Federn
nd a Maikäfer mit an Pfluag
Und a Filzlaus han i nia gsegn
Mit an grean Huat.

Han i ehnta nia gwißt,
Wia dar Fuchs d'Henna frißt.
Aba hiazt woaß is schon:
Ban Schwanz packt asa n.

An I und an O
Und an R und an N.
Und a Kuah scheißt an größern Dreck
Als wiar a Henn.

Gestern hat 's Kalmerl gstiert,
Heunt ham ma 's Kaiberl kriagt.
's Kaiberl va lauter Schen,
Das müaß ma spen'.

Alleweil, alleweil
Geht's a so zua,
In da Fruah, wann i melcha geh,
Findt i koa Kuah.

Es is nix so traurig
Und nix so betrüabt,
Als wann si a Tuschn
In a Krautkopf valiabt.

Da Zwetschbnknödl und da Fastnknödl
Ham si nit vatragn.
Hat da Zwetschbnknödl den Fastnknödl
Übern Tisch ahigschlagn.

Nudl in da Rein, Nudl in da Rein,
Heunt muaß' no lustig sein !
Nudl in da Rein, Nudl in da Rein,
Lustig muaß' sein !

Nudl in da Brüah, Nudl in da Brüah,
Furt auf d'Nacht, hoam in da Früah.
Nudl in da Brüah, Nudl in da Brüah,
Hoam in da Früah.

Zan Frühstück a Gansl
nd Fisch auf Mittag,
Um halber drei Krebsn
Und Vögln auf d'Nacht.

Dort intn ban Bah
Steht a Haus ohne Dah,
Steht a Haus ohne Tür,
Hängt a Grasdaxn vür.

Kost' dann das Rauhpfangkehrn
Gar a so viel Geld ?
Und hiazt kauf is an Besn
Und kehr die ganz' Welt.

Eisenbahn, Eisenbahn,
Lokomativ.
Zerst hat's a Häuberl tragn,
Hiazt nur an Pfiff.

Und an Automobil
Is an Automobil.
Kan ma sagn, was ma will,
's is an Automobil.

Habt's oder habt's nit,
Wann's nur aufgnaglt is,
Wann's nur angnaglt war,
Das' bald Feierabend war.

Da Huat is über d'Leitn ahikugelt,
's Kammerfensa hat's a verschniebn,
Da Kellnerin ham's d' Katz davon.
's Stehln geht hiazt an.

Und wer hat dann das Schübern
Und Häufln aufbracht,
Daß d'Leut a so schübern
Und häufln auf d'Nacht ?

Über d'Stiegl, über d'Zäun
Muaß ma d'Mentschar umighei'n,
Und d'Buamar a dazua,
Sist gebn's koan Ruah.

Mentscha sand Luader,
Soweit oane is,
Weil die alt Hessnsefa
Eahn Guckahnl is.

Da Lipp und da Lenz
Hamd an oatuttats Mentsch.
Und da Lipp hat's nit gwißt,
Daß 's Mentsch oatuttat is.

Hinter da Hollerstaudn,
Da schaut's so schiah aus,
Da sitzt an alts Weibl
Und kamplt ihr aus.

Hinter da Roßstalltür
Hängt an alts Ochsngschirr.
Spanna ma d'Voglhuaberin an
Und foahrnt davon.

D'Voglhuaberin is krank,
Leit dahoam auf da Bank.
Sie hat an wödertn Fuaß,
Weil's ins Arbeitshaus muaß.

Hat's alleweil ghoaßn,
D'Voglhuaberin wurd' ghenkt.
Aba weil's so schen singa kan,
Wird ihr s Lebn gschenkt.

Drent ba da Haslstaudn
Sitzt a Krowat.
Und er traut eahm nit vüra,
Weil er d'Hosn voll hat.

D'Alte bacht Krapfn
Und brunzts aweng an.
Aft werdns schen saftig
Und brinnand nit an.

Gschissn is nit gmaln,
Und da Dreck is koa Salbn.
Wann da Dreck a Salbn war,
War' gschissn gmaln a.

Gestern auf d'Nacht,
Da han i was glacht.
Han no nia so viel glacht
Wia gestern auf d'Nacht.

Mei Godn is gstoribm,
Was hat s' ma vamacht ?
In Sunnschein ban Tag,
In Mondschein auf d'Nacht.

Gestern und heunt
Hat da Mond so schen gscheint.
Hat nia so schen gscheint,
Als wia gestern und heunt.

Gestern hats gregnt
Und heunt regnt's a,
Und moring wird's regnar
Und übermoring a.

Schauts na, wia's regna tuat,
Schauts na, wia's giaßt.
Und wia va da Dachrinn
Da Regn oha schiaßt.

Wann's allweil regna tuat,
Is 's Eingrasn a nit guat.
Werdn d'Mentscha waschlnaß
Bis auf'n Arsch.

Wann's na nit regna tuat,
Wann's na nit schneibt,
Wann's na nit schlechter wird,
Wann's na so bleibt.

In Himmerl ham's an Schimmel,
Da Schimmel scheißt Geld.
I brauchat den Schimmel
Herint auf da Welt.

Wann is in d'Kira geh
Und a weng bet,
Aft schickt ma da liabe Gott,
Was i gern hätt.

Wannst in Himmel willst kemma,
Muaßt da Händling mitnehme,
Denn in Himmel is kalt,
Weil da Schnee ohafallt.

Wann da Mond scheint, scheint da Mond,
Wann a nit scheint, scheint a nit.
Wann d'Sunn scheint, scheint d'Sunn,
Wann s' nit scheint, scheint s' nit.

Grüaß di Gott, pfüat di Gott
Is a schens Wort.
Und das letzte Mal "Pfüat di Gott"
Is a weng hart.

Da Herrgott im Himmel
Muaß selba lacha,
Was d'Leut auf da Welt
Für Spektakel macha.