's Ausseer Tal
Is net z'eng, is net z'schmal,
Is net z'weit, is net Z'seicht,
Is a Tal, was mi gfreut.

In Aussee is nix,
Is koa Wasserl, koa frisch's,
Is koa Graserl, koa greans,
Und koa Diandl, koa schens.

Mir san in Aussee z'Haus,
Mir lassn koane aus,
Strick und Strang reiss' ma a,
Mir lassn nit na.

Und in Ausseer Tal
Sand die Bettlan gar schmal.
Muaß mi gleim zuahalegn,
Daß i nit ohafall.

Auf und auf na da Traun
Flingitznt d'Stoan.
Und koa oanziger Gasslbua
Kann ma was toan.

Auf und auf na da Traun
Geht da kalt Wind.
Und was is um das liadala
Pfannhausergsind ?

Auf und auf na da Traun
Flingitznt d' Stoan.
Das groß Müllnermentsch mag is nit,
Aba das kloan.

Auf und auf na d aTraun
Wachsn siaß Birn.
Aba Diandl, heb's Kiderl auf,
Laß mi probiern.

Auf und auf na d aTraun
Geht da kalt Wind.
Und bei mein Diandl woaß i 's schon,
Sie hätt's gern gschwind.

Hiazt han i an Zwoanzger
In d' Trau einikei't.
Und hiazt han is a Diandl,
Was mi ar amal gfreut.

Aus übern Radling
Schau i no amal um.
Mei Schatz is in Aussee,
Wia load is ma drum.

Eini durchn Stoa
Mit mein sakrisch schen Gwand.
I muaß zu mein Diandl
Im Ausseerland.

Aba Aussee is a lustigs Tal,
Still ruht der See.
Gestern ham ma Griaßknodn ghabt,
Fürchtet euch nicht.

Umadum in Aussee
Bis hi auf die Klacha
Is koa so schens Diandl,
Was mar a Schneid kunnt macha.

Hopalapo.
Es sand Ausseer da.
Es sand lustige Leut,
Weil ea 's Hoamgehn nit gfreut.

Bald d' Ausseer tanzn,
Aft schwingt sie da Bo'm.
Aft sagt halt d' Frau Wirtin:
Es sand Ausseer obn.

Bald d' Strassner Buam tanzt,
Aft schwingt sie da Bo'm.
Aft sagt halt d' Frau Wirtin:
Sand d' Salzhehler obn.

Bald d' Strasser Buam fensan gehn,
Nehman's an Fahn.
Bald's an Scherhaufn sehant,
Aft laufen's davon.

Auf da Postbruckn
Bleibt da Hohzatwagn stehn.
Die Braut muaß gschwind aussteign,
Weil's zudeln muaß gehn.

Zwoa schwarzbraune Rößlan,
An klinglatn Wagn.
Das is da Graf Meran,
I kenn 'nar i Fahrn.

Da Scheiber von Eselbah
Fahrt mit die Kiah,
Sitzt auf das Deichslstang
Und schnalzt mit die Knia.

Und in Sunntag is Kiritag,
I gfreu mi schon drauf.
Und da kimmt da Gallnloiperlbua,
Macht ins oan auf.

Buam, tuats nit lärima!
Sist kimmt da schwarz Beringa.
Tuats nit so schrein,
Sist spirrt ar enk ein.

Die Fremdn habn Häuser baut,
In Markt habn si d'Auto gstaut,
Gseitelt habn a a poar.
A ganz normals Jahr.