In Altausseer See
Schwimman d' Fisch in d' Heh,
Schwimman auf und nieder.
Diandl, heut kimm i wieder.

Hiazt han is a Mentsch,
Es is aba nit gwiß.
Z' Altnaussee is obn,
Wo da Mentschaneid is.

Wann Trisslwand Schweiners war
Und der See Rum,
Aft schwimmat is allweil z'glei,
Im See umadum.

In Augst is hoh auffi
In Rettenbah tiaf.
Auf Blaa geh i net eini,
Hamd d'Mentscha koa Liab.

Und i geh neama eini
In Rettenbahgrabn.
Passnt allweil sechs Jagan
Und etla Schandarm.

Mei Vader is a Lupitscher,
D'Muatter stühlt a.
Mei Bruada is in Zuchthaus drin
Und mi suachen s' a.

Z' Pitzing und Vorderalm
Hat ma koa Mentsch nia gfalln.
Z' Sandling sand ar a vier
Höllvadammt schia.

Da Waldhauser is gstoribn,
Da Bahwirt is krank.
Und da Loitzl hat d'Huastn,
Lebt a neama lang.

Wann is übern See fahr,
Schau i's Gamsbirig an.
Und oft kenn i mei Diandl,
in Jugitzn schon.

's Fahrn aufn Wasser
Is gfährli beim Wind,
Wia s' Schlafn beim Diandl,
Bald da Bauer scho kimmt.

Übern See, übern See
Fliangt meine Taubn in d'Heh.
Muaß i ar amal umifahrn,
Federn zsammklaubn.

Wann alle Leut schlafnt
Und san in da Ruah,
Aft kimmt übers Wasser
A lustiger Bua.

Wann d'Altausseer Buam fensaln gehn,
Nehman's a Fahn.
Bald's an Scherhaufn sehant,
Aft rennan's davon.

Beim Branauer in' Tenn
Steht a Opel Kapitän.
Steht a Opel Kapitän
Voller Spinnaweten.