Sagnt allweil d' Leut,
I sitz allweil beim Wirt.
Aba das roatn s' nit,
Daß mi allweil dürst.

Trink is a Halbal Bier,
Sagt glei da Wirt zu mir:
Du klaoner Häuslbua
Hiatst scho bald gmua !

's Bier is gallhantig,
Da Branntwein is siaß.
Und 's Mentsch is saugrantig,
Wia war's, wann i's liaß ?

Und da Branntiwein is guat,
I kauf ma no koan grean Huat.
Wann da Branntiwein nit war,
Hiat' i lang an Huat a.

Wer nia koan Branntwein trinkt,
Kriagt nia koan Rausch.
Und wer nia bei koan Diandl leit,
Kennt si nit aus.

Mei bester Kamarad
Is in Keller druntn,
Hat a hülzers Gwand an,
Is mit Roaf verbundtn.

Brauns Bier, i kenn di schon,
Hast as mein Vadern toan,
Heunt tatst as mir.
Leck mi in Arsch, du brauns Bier !

Wann Berig und Tal Branntwein war
Und da See Bier,
Aft liabat i Berig und Tal
Und koa Mentsch nia.

Heunt san ma rauschig
Und morig nit nüacht.
Und wer woaß, was den oan' Tag
A wieder gschiacht.

Gsundheit sagnt d'Fuhrleut,
Hat da Wirt an guatn Wein.
Hat da Wirt a schene Kellnerin,
Kehrn d' Fuhrleut gern ein.

Und da Wirt is so fein,
Schenkt koan Rauschign nit ein,
Weil's eahm selbm oft passiert,
Daß er a rauschig wird.

Was tat denn da Wirt,
Wann d' Mentscha nit warn ?
Er müaßt eahm sein Bo'm
Mit an Stoan niederschwarn.

Und d' Frau Wirtin is toll,
Auf'n Bauh wächst ihr d' Woll.
Und da Wirt reißt ihr s' aus,
Macht sie Stimpflsöcklan draus.

Da Wirt und d' Frau Wirtin
Sand a neamar oans.
Da Wirt hat a Zipferl
Und d' Wirtin hat koans.

D' Frau Wirtin is schwanger
Und d' Kellnerin dick
Und 's Kuchlmentsch in da Hoffnung.
Die Leut habmd a Glück.

D' Frau Wirtin is schwanger
Und d' Kellnerin dick
Da Wirt hat in Tripper.
Die Leut habmd a Glück.

So a schene Kellnerin
Hamd ma a no nia ghabt,
Die koan Arsch und koan Bauh
Und koa Tuttlzeug hat.

Tua nit a so singa,
Tua nit a so prahln,
Tua liaba da Kellnerin
Deine Schuldn bald zahln.

Aba Kellnerin, abe Kellnerin,
Aba schiaß na recht um !
Und dahoam laufnd d' Mäus
In da Briaftaschn um.

D' Kellnerin in Keller
Tuat Wasser pumpn.
D' Frau Wirtin schreit außa:
's is guat für d' Lumpn.

Wann 's Wirtshaus a Kira war,
's Mentsch an Altar,
Aft möcht is a Pfarrer sein
Sechsadreißg Jahr.

Weil's Wirtshaus koa Kira is
Und 's Mentsch koa Altar,
Drum möcht i a nit Pfarrer sein,
Nit a halbs Jahr.

A frische Halb Bier
Hat an Foam, an weißn,
Und heunt gehn ma nit hoam,
Bis ins außischmeißn.

Schneid Birbam, schneid Buxbam,
Schneid birbuxbama Ladn,
Aft kriagn mar an birbuxbaman
Tanzbo'm, an rarn.

Koan Fidlbogn, koan Baßgeign,
Auf da Wänd gibt's koa Keglscheibm,
Koane Spielleut ham ma ghabt,
Hamd mit'n Spinnradl aufgmacht.

Ludln und singa
Und 's Geldl annbringa.
Bei alle Tanzlan dabei,
Wia ma's machant allweil.

Insa Dirn geht zan Tanz,
Packt in Buam her.
Und abn Schwanawirt ham s' einertanzt
Fest auf da Erd.

Lustig und kreuzfidel !
Hoam gehn mas nit so schnell.
Hoam gehn mas moring früah
Oder gar nia.

's Liadl is aus,
Hat si singa lassn.
Wer an Branntiwein hat,
Sollt mi trinka lassn.