Lustige Buam san mar,
An Kreuzer Geld ham ma.
A schens Diandl liabn
Toan mar a, wann ma's kriagn.

Lustig in Ehrn
Hat da liabe Gott gern.
Mit die traurign Leut
Hat er selber koa Freud.

Lustig is' auf da Welt,
Wann da Bua hat a Geld,
Und 's Diandl hat a Schneid,
Das is a Freud.

Lustig is 's Bua sein,
I tausch mit koan Man.
Bald mi 's Diandl nit gfreut,
Steh i auf und geh hoam.

Lustig und kreuzwohlau
Und a grings Gmüat.
Und a so müaßt mei Diandl sein,
Wann i oans hiat'.

Lustig und kreuzverwegn
San mas ban Mentschan glegn.
Schneid ham mar a für vier,
Braucht ham ma s' nia.

Lustig im Himmel drobn,
Im Paradeis a,
Toand d'Engalan musiziern
Und da Heilig Geist a.

Lustig is auf da Welt,
Hat d'Herrschaft a koa Geld.
Is für ins a koa Schand,
Wann ma koans hamd.

Lustig is 's Luaderlebn,
's Geld hat ma d'Muatter gebn,
's Mentsch han i selber ghabt,
Daußt in da Stadt.

San ma na lustig,
Dieweil's ins guat geht !
Und dieweil ins da Weckn
Ban Sack außa steht.

San ma na lustig,'
Dieweil ma san jung !
Und an alte Goaß macht ja
A oft no an Sprung.

Schreibts es auffi auf d'Tür,
Da i so liadala bi !
Lests as oha, wia's steht,
Daß' an Liadalan geht.

Und wann koane liadalan
Buama nit warn,
Wer tat denn den Wirtn
Die Fassar auslarn.

Da Bua, der hupft und springt
Und schene Liadlan singt,
Dem machn d'Mentscha auf,
Bald ar eahn kimmt.

I bin a jungs Bürscherl,
Ka lesn und schreibn
Und kan a mein Diandl
Die Langweil vertreibn.

I bin a jungs Bürscherl,
I han a jungs Bluat.
Und wia si da Wind draht,
So draht sie mei Huat.

Juhe, is das a Lebn !
Kann's denn was scheners gebn,
Als wann mar is voglfrei
Und gsund dabei ?

Und wer hat ma's verüblt,
Wann i wasdawöll tua ?
Bin a fescher, a gsunder,
A lustiger Bua.

Fuchs passn tua i nit,
's is ma weit z'kalt.
Paß liaber auf a Füchsin,
Hat a an schen Balg.

Koa sauers Kraut mag i nit,
Lauter süaße Ruabn.
Ös seids weng da Mentscha da,
Gelts, meine Buam ?

D'Leut hamd ma's lang scho gsagt,
Glaubt han is nia:
Die langhaxatn Mentscha
Hamd gspitzata Knia.

Gestern hat's a Schneeberl gschniebn,
Heunt hat's koan Reif.
's Geld muaß ma durigfalln sein,
Weil i koans greif.

Jugitz allmal,
Wanns a Brautführer bist.
Wann Zuschauer kemmand,
Daß' lustiger is.

Heiratn mag is nit,
Is ma no z'fruah.
Koan Warmstoan brauch i nit,
Kalt is ma nia.

Aba seit i verheirat' bin
Und bin a Man,
Hiazt schaut mi koa saubernes
Diandl mehr an.

Seit i verheirat' bin,
Geht's ma scho guat.
Hiazt trag is am Sunntag
Mein Weritaghuat.