A Gams han i gschossn,
An zodatn Bock.
Wiar i 'n auswoadna will,
Is' a Kranawitstock.

An Hasn han i gschossn
Und an zodatn Bock,
Für mei Weib zu an Kidl
Und für mi zu an Rock.

Auf d' Scheibn han i gschossn,
Da Böller hat kracht.
Und in Dreivierteljahrn
Hamds ma 's Best daherbracht.

In Gams han is a Pulverl gebn,
D' Jagern sand a danebn,
's Büchserl is a dahi,
Kreuzsakradi !

Und bald schiaß is a Gamserl,
Bald schiaß is a Reh.
Und bald schiaß is mei Diandl
Und tua ihr nit weh.

A Gams und a Reh
Und das woaß mar an eh.
Und wo a 's nit schiaßt,
So lebt's no fidel.

A Büchserl zan Schiaßn,
A Hunderl zan Jagn,
A Diandl zan Bussn
Muaß an jeder Bua habn.

Und an Schützn hamds gfanga,
Und i trau ma's nit z'sagn,
Der hat vorigs Jahr no
In Schulerpack tragn.

Wegn 's Gamslanschiassn
Han is ins Zuchthaus müassn,
Und wegn's Lebern bratn
Mag i 's no nit gratn.

Lustige Leut san die
Wildbratschützn.
Hamd a toiflschwarz' Gsicht
Und a Kugelbüchsn.

Sein tuar i a Wildbratschütz,
Habntuar i a schlechte Büchs.
Tuschn tuat's a nit hell,
Zsamm reißt's as schnell.

Das han i a nia ghert,
Daß da Wildschütz hiat' grehrt.
Aba d' Jagernallmal,
Bald ma's ajagt ins Tal.

Wann koan Almhüttn war
Und koa stoanas Wandtl,
Wo hiet' dann da Wildschütz
Sein Intastandl ?

Graft ham ma, Wildbrat gstohln,
Mentscha g'liabt auf da Alm,
Gams gschossn in Gebirg;
Alls is probiert.

Aba d' Schandarm und Deaner
Und Jagern, das Gfraßt,
Sie kriagnt koana koan Mentsch,
Es is eh die letzt Paß.

Rotzige, protzige
Jagerskraxn,
Hast eh nix wia Rehlauf
Und Hasnhaxn.

Da Hirsch hat zwoa Gweih
Und da Jager zween Hund.
Grüaß di Gott, du schens Diandl !
Ja, wia geht's da ? Bist gsund ?

D' Jagern und d' Hund
Und die langan Stecka,
Die kunnan ins kreuzweis
In Bugl lecka.

Mei Vader is a Jager,
Ar Hund, an adrahter,
Geht aus mit da Büchs,
Aba hoam bringt a nix.

's Gams in da Wand
Hat an oanseitign Stand,
Hat a Kruckar in Hirn
Wiar in Illing sei Dirn.

D' Gams in da Wendt
Hat si links umidraht.
Und die aufrichtign Mentscha
Sand so viel dünn gsat.

D' Gamserln toan pfeifn
Und d' Hirscherl toan rehrn.
Und d' Buama toan greifn
Und d' Diandlan habn 's gern.

Bald d' Gams amal pfeifnt,
Aft schwingt si da Bart.
Und es hilft dir koa Schleicha,
Sie hamd die scho gwahrt.

Hiazt muß i mei Steigeisn
Spitzn lassn,
Sunst muaß i das Gamserl
Im Birig lassn.

Trallalafix,
Wann i faihl, triff i nix.
Und wem geht's denn was an,
Wann i faihl gschossn han.

Heut gfreut mi mehr nix
Als mei greaner Huat.
Bald is a voll federn,
Bald is a voll Bluat.

Wer Hahnfedern tragt,
Is a Hennabucka.
Und wer koane aufsteckt,
Sollt ma's ohazucka.

Da Huat is von Huatarer,
D' Federn von Hahn,
Und da Buschn von Diandl.
Wem geht's dann was an ?