Drei Schuaster, drei Schneider,
Drei Weißgaribergselln,
Die hamd alle neun
In oan Strumpf aha wölln.

A leinerne Hosn,
A rupferne Pfoad,
Das is in Pfannhausern
Eahn' Weritagkload.

Mei Schatz is a Jager
A kloanverdrahter.
Er geht aus mit da Büchs,
Aba hoam bringt a nix.

Mei Schatz is a Müllner,
Tuat Tag und Nacht mahln.
Hiazt is ma da Tolpatsch
In d'Mehltruah gfalln.

Mei Schatz is a Bäck,
Hat an weißn Vürflöck.
Und zan Angedenka,
Laßt an ahi häna.

Mei Schatz is a Schneider,
Er arbat recht fein.
Und hiazt muaß eahm in d'Finger
D'Liab kemma sein.

Mei Schatz is a Schreiber,
A Schreiber soll's sein.
Bald spitzt ar eahm d'Federn,
Bald tunkt ar eahms ein.

's Diandl is wacker,
Sie liabt an Fleischhacker,
Und sie bleibt eahm a treu
Mit ihrer Fleichhackerei.

Diandl heirat koan Maurer,
Du heirats in d'Not,
Hast im Summer koan Man
Und in Winter koa Brot.

Diandl sei gscheider
Und heirat koan Schneider.
Und heirat an Schmied,
Dann kannst hammern damit.

Lustig is gwesn
Den vorign Winter.
Habnt zwo Mentscha grauft
Um oan Besnbindter.

I bin a Fleischhacker,
Treib umars Eck,
Und mei lustiger Hund
Har ma's Diandl aufgweckt.

I bin a Fleischhacker,
Treib auffa von Enns,
Han s Kaibl vertauscht
Um a kreuzsaubers Mentsch.

Heutn hani mehr alls bei mir,
Bandlan und Spagatschnür
Und an Melissngeist
Und a gselchts Fleisch.

Hiazt schaun mi d'Leut
Für an Sauschneider an.
Und i han ja mein Lebtag
Koan Fadl nix tan.

Schuasterl, pick, pick,
Drei Nadln, vier Spitz,
Drei Katzn und vier Mäus
Is in Schuastern eahn Speis.

Neunaneunzg Schneider
Hamd achtaneunzg Pfund.
Und wann's soviel nit hamd,
Aft sands nit recht gsund.

Da Schneider reit' auf da Goaß,
D'Goaß macht an Sprung.
Da Schneider schreit: Helfts ma Leut,
's Vieh bringt mi um.

Da Schneider reit' auf da Goaß,
D'Goaß macht an Riß.
Da Schneider schaut hintern Schwanz,
Wiaviel daß 'is.

A Schandarm und a Jager,
Das sand meine Schwager,
A Finanzer mei Göd,
Drum mögn mi d'Leut net.

Dreizehn Polizisten
Und vierzehn Schandarm
Sand siebnazwanzg Lumpn,
Wann's zsammbundn sand.

Aba Schandarm, ös Luadabuam,
D' ganze Nacht umahurn,
In da Fruah ins Kaffeehaus gehn,
D'Arbat bleibt stehn.

Bald ma koa Geld nit habn,
Gehn ma za da Eisnbahn.
Durt kemman alle zsamm,
Die koan Geld habn.

Obn auf da Leitn,
Da sitzt a Kadett.
Hat s Hosntürl offen
Und putzt 's Bajonett.

D'Augn voller Wasser
Und d' Hosn voll Dreck,
So gengant d'Rekrutn
Von Kurhausplatz weg.

Und da Kaiser hat's außagebn,
Es ist kurios.
Es müassnt d'Buam Reiter werdn
Und d'Mentscha d Roß.

Aba bald d'Buama d'Reiter werdn
Und d' Mentscha d' Roß
Aft is 's Soldatenlebn
A ganz kurios.

Insern Herrn Pfarrer
Sein alte Frau Moahm,
Die tuat in an Sunntag
In Keller Zwoanzga zsammzoan.

Auf da Wischbänk, auf da Waschbänk,
Auf da Gartnplanka,
Da sitzt der Herr Pfarrer
Und tuat Vögl fanga.

Inser Herr Pfarrer
Hat d'Sauschneider gern.
Hiazt laßt er eahm d'Köchin schneidn
Statt an Saubärn.

A Pfarrer hat d' Köchin gern,
Sie halt eahm in Ehrn.
Dominus vobiscum,
Tanzt a drauf rum.

Guadn Moring, Herr Pfarrer,
Was macht da Kaplan ?
Er liegt auf da Köchin
Und kraht wiar a Hahn.

Da Pfarrer liabt d' Köchin,
Da Mesner die Dirn.
Und d'Ministrantn, die Spitzbuam,
Wollnd's a scho probiern.

Siebn Eisnbahner, neun Bedlmaner
Und a Kramperl und a Miglo
San znagst auf Maria Taferl ganga
Und bis heut is no koana da.