Mir sand die segn Seer Buam,
Mir hamd a Schneid.
Mir liabn d'Mentscha in da Stadt
Und auf da Weid.

Aba Strassner Buam, riglts enk !
D'Gößler Buam priglnt enk.
Nehmant enk d'Mentscha weg,
Aft habts an Dreck.

D' Grundlseer Jagern
Sand Schütznschindter,
Und die kemmant ma vür
Als wia d'Fleh im Winter.

Und die Landtlerbandtler,
Die Nudldrucker !
Und wann d'Gößler Buam kemmant,
Müassn's umirucka.

's Diandl is weiß und rot,
Weiß wia da Schnee.
Und das macht's kalde Wasserl
Von Grundlseer See.

Wo sand die schen Mentscha,
Wo ha'ms' eahne Gei ?
Ban Grundlsee drinnat,
Da wißt is a drei.

Wo sand die schen Mentscha,
Wo ha'ms' eahne Gei ?
Ban Schraml in Sperrbühl,
Da wißt is a drei.

D' Grundlseer Mentscha
Stehnd kniatiaf in See.
Aba Buama dabarmts ekn,
Da Hunger tuat weh.

D' Vordernbacher Mentscha,
Sie moant, sie sand schen.
Aft müassn's in Gößl
Ins Buama bedln gehn.

Und d' Salzarer Mentscha
Toand tanzn lerna.
Hamd Nagln in Schuahn
wie d' Ochsn Herna.

Und d' Salzerer Mentscha
Sie moant so machtig.
Aft sand's umaduma
Ganz wederschlachtig.

Und d' Salzerer Mentscha
sand all numariert.
Ban Tofferl in Saustall
Da wern's lizetiert.

Brunnwiesalm, Breitwiesalm
Da hamd ma d' Mentscha gfalln.
Henarsch sand ar a vier,
Höllverdammt schiah.

Brunnwiesalm, Breitwiesalm
Da hamd ma d' Mentscha gfalln.
De Henarsch glei a danebn,
Das war a Lebn.

In d' Breitwiesn auffa
Geht a stoaniger Weg.
Muaß a leichta Bua sein,
Der in d' Breitwiesn geht.

In Vordarnbah Tret
Sand drei Mentscha z' habn.
Und wanns es nit glaubn wöllts,
Müaßts inseroan fragn.

Übern See bin i gfahrn
In an gläsaran Wagn.
Und an iader Bua kan ja
Koa Domarin habn.

Auf über Almberig,
Z' Wildensee a.
Und hiazt is da Graf Kesselstatt
A wieder da.

Leg die na zuawa
Und sei mir nit z' bös.
So sagt da Graf Kesselstatt
Za da Frosch Thres.

Übern Almberig auffi
Und z' Wildensee a.
Und hiazt is da Graf Kesselstatt
A neama da.

Und beim Rebenburig sein Brunn
Wachst da Mias umadum.
Geht in Tripps und in Drall
Wie die lustign Buam all.

Beim Steirer auf dar Au
LEit da Knecht auf da Frau,
Und da Herr auf da Dirn.
Toan multipliziern.

Grundlsee, Grundlsee
Is a schene Lacka.
Die schenist in Gößl
Is d' Faitler Tochta.

Wann is a schen war
Wia die Faitler Tochta,
Aft liaß i ma
Bamwollane Tuttn macha.

Bamwollane Tuttn
Und greanseidna Schuah,
Und die laß i ma halt macha,
Bald i heiratn tua.

Und in Gößl is koane drin,
Der i's nit einibring.
Druck i mit'n Finger drauf,
Springt d' Büchsn auf.

Almdiandlan, ganze Scharn,
Siahgt ma zan Ladner fahrn.
Toant übern See 'nein
Ludln und schrein.

Beim Ladner in Keller
Tuat 's Wasse sausn.
Und vorn Veit eahnra Kellnerin
Tuat ma lang scho grausn.

Beim Rotbarscht schene Fensa,
Beim Buderer a schens Haus,
Und beim Veit die schen' Mentscha.
Buam suachts enl's nur aus.

Z'erscht han i Kegel gschieben,
Aft han i gfischt.
Aft han i die schene
Veit Berschta dawischt.

Gößl is oans,
Is a Dörferl, a kloans,
Is a Dörferl, a feins,
Und das Dörferls is meins.

Hiazt schauts in liabn Gößl an.
D' Kira steht ganz voran,
D' Häuser sand a danebn,
Das war a Lebn.