Hiazt hat oaner gsunga,
Hat gsunga über d'Wies.
Das is ja da Hansl
Mit sein Oachkatzlgfriß.

Hiazt hat oaner gsunga,
A junger Kerl.
Aba Füaß hat a ghabt
Wia zwoa Pfeifnröhrl.

Hiazt hat oaner gsunga,
A Fischhausmandl.
Mir bracht'n leicht anhi
In an iads Einbrennpfandl.

Hiazt hat oaner gsunga
Mit an weit z'dickn Hals
Er kan's nit daschnaufn,
Vawicklt si alls.

Hiazt hat oaner gsunga
Ja ganz ohne Reim.
Bald a no amal singt,
Geht eahm 's Gsicht ausn Leim.

Hiazt hat oaner gsunga,
Hat grad halt nit grehrt.
Ban Nachbarn ham's a Kaibl,
Dos grad a so plärrt.

Hiazt hat oaner gsunga,
Das hat si nit greimt,
Dem ghört dafür d'Zung
Zan Arsch umigleimt.

Hiazt hat oaner gsunga,
Den is s'Rotz aha grunna.
Wann a n amal singt,
Aft schneuz i ma schon.

's Rotz Aharinna,
Das geht di nix an.
I nimm gschwind mei Tüacherl
Und oft schneuz i ma schon.

Hiazt hör i oan singa,
Singt allweil das alt.
Der söllt's aufn Ofn legn,
da wird's eahm nit kalt.

Hiazt söllt oaner singa
Und er woaß neama koans.
Dahoam aufn Kastn
Vaschimplt eahm oans.

Und wannst hiazt koa Gstanzl woaßt,
Kimm grad za mir.
I hans's j no dutzendweis
In Hosnsack bei mir.

Das söllt a Gstanzl sein,
Kennt mar eahm nit an.
Hat si anghört wiar a Raunzer
Von an zwidern altn Man.

Ban Gasslreimsinga
Da kannst mi nit kriagn.
Denn i han ban Arsch mehr Vastand
Wia du ban Hirn.

Hiazt geht oaner einer
Ba da Gastzimmertür.
Hiazt war ma scho liaber,
Er raufat mit mir.

Hiazt schauts ma den Lali an,
Wiar dá da steht.
Er traut eahm's ja nit z' begehrn,
Was a gern hätt.

Schauts enk den Lali an,
Wiar a da sitzt.
Hiazt gebts eahm a Wurscht ins Maul,
Ob as wohl frißt.

Wer va uns da da Lali is,
Das werdn ma glei sehn.
Hiazt toan mar a poar singa,
Aft wird sa si gebn.