Ban Diandl ihrn Fensa
San weiße Rosn,
Da bin i schon oft hängabliebn
Mit da Gattihosn.

Bei mein Diandl ihrn Fensa
Is a Hunderl aufgmaln.
I trau mi nit zuahi,
Das Luader macht kalln.

Ban Diandl ihrn Fensa
Is a Raubvoglnest.
Und i trau mi nit zuahi,
Die Luadern sand bes.

Ban Diandl ihrn Fensa
San d' Kerschn zeitig.
Und sie laßt mi nit zuaha,
Dia Sau, die neidig.

Ban Diandl ihrn Fensa
Hat's an Eisplattl gmacht.
Wann a fremder Bua kimmt,
Daß er rutscht bei da Nacht.

Za dir bin i ganga,
Za dir hat s mi gfreut.
Und za dir geh i neama,
Der Weg is ma z' weit.

Zan Mensch bin i ganga
Die ganze Wocha.
Die letzen zwao Tag
San ma d' Hülzen brocha.

Fensan bin i ganga
Drei Viertelstund weit,
Han 's Fensa nit gfundtn,
Han d' Mauern kloa z'kräult.

Fensan bin i ganga
Za da Stoanwandtldirn.
Han 's Fensa nit gfundtn,
Han da Goaß aha gschrian.

Hoh auffi, hoh auffi,
Hoh auffi steig i,
Steigt neamd so ho auffi,
Hoh auffi wiar i.

Wiar i auffi bi gstiegn
Auf d' Loatersprüssl,
Aft schreit da Bauer aussa:
Bua, wart a bissel.

Auffisteign, zuahiloahn,
Gasselreim kan i koan
Und anläutn bei da Tüa
Schickt si gar nia.

Üba d' Stiagl steig i nit,
Ban oan Diandl bleib i nit,
Allweil überecks, überecks,
Allweil fünf, sechs.

Buama geht's auffi
Zan Nachbarn seiner Dirn.
Hat ins Bett ahigschissn,
Mag d' Füaß neammer kriagn.

An Sprung übers Gassl,
An Jugitzer drauf,
Aft klock is ins Fensal:
Schens Diandl, mach auf !

Wann i zu mein Diandl geh,
Schrei i juhe, juhe,
Diandl, nur gschwind aufsteh,
Juhe, juhe !

Bin i halt kemma
Ba da stockfibstern Nacht.
Da hat da des Luader
An andern drein ghabt.

Machst ma nit auf,
Nacher zoag i da d Feign.
Und in Sunntag is Kiritag,
Magst a dahoam bleibn.

Da Bauer hat gschrian:
Geh ma weg von da Dirn !
Wann a no amal schreit,
Hoaß i eahm an Weiberleutneid.

Wiar i munter bin woarn,
San d Hosn in Koarn,
Aft bin i mi da Garschn
Ins Feld aussigfahrn.

Spitzbua, Du Schlankl,
Du Spatznfanger !
Und du bist zu mein Diandl
Ins Gasseln ganga.

Du Lausbua, du Rotzbua,
Du Spatznfanger !
Und du bist zu mein Diandl
Ins Fensa ganga.

Entas Haus, drentas Haus
Passnt ma d' Lausbuam a,
Weil sa si allweil gran,
s' Mentsch macht mar auf.

Dreimal uman Stadl
Und viermal ums Haus.
Und wannst ma's hiazt no nit leigst,
Reiß i dar's aus.

Geh nit so laut eina,
Es kracht ja da Bo'm.
Du bist ja a Tolpatsch,
Hast d' Schuah nit auszogn.

De oa, de hat gmoant,
De oa, de is gleahnt,
De oa, de is glegn,
Hat gwart' auf an Segn.