Hallstadt und Obertraun
Toant gegnarnanda schaun.
D' Hallstatt hat's nit gwißt,
Daß das d' Obertraun is.

Wannst a Diandl willst liabn,
Muaßt in d' Hallstatt hinauf.
Die hamd in Kropf in da Seitn,
Fahrt d' Eisnbahn drauf.

Aufn Soarstoaner Spitz
Hat 's Vogerl sein Sitz
Und 's Gamserl sein Platz
Und i mit mein Schatz.

Aufn Soarstoaner Spitz
Hamd's a Häppin daschlagn.
Hiazt müassn d' Scheißjager
Das Fleisch ahatragn.

Aufn Soarstoaner Spitz
Is a Häppin dafrorn.
Müassn drei Jagern auffi gehn,
's Fleisch oha tragn.

Aufn Soarstoaner Spitz
Is a Mentsch übergstiegn.
Und hiazt is ihr die Halbat
In Spitz hänga bliebn.

Wann is nit gseha hiat',
Hiat' is nit glaubt.
Aba so hat die Halbat
Von Spitz ohagschaut.

Aufn Soarstoaner Spitz
Geht a Wind, a woacher.
Die Soarstoaner Buama
Sand Hosnoacher.

's Diandl in da Gosaumühl
Laßt in Buam, wann er will.
Laßt in Buam übersteign
Über ihr Geign.

Von Goisern bis Lauffen
Da braucht ma koan Paß.
Sand hin und hin d' Wirtshäuser
Und die broat' Straß.

's Mentscherl va Lauffen
Die tuat's oft verkaufn,
Tuat's aba herleiha a,
Wann ihr grad darna war.

Z'Ischl und Aussee
Sand schene Mentscha.
Aba in Lauffen schaun's aus
Als wia d' Kuchlfensa.

Z'Ischl hamd's a Nachtgschirr gstohln,
Da Hebamm die Klistierpistoln,
Mir hamd sie 's Mentsch davon.
's Stehln geht hiazt an.

's Diandl hat a Goldhaubn auf
Und a weiß' Kload
Und an sakrisch Schnittlastock
Hinta da Pfoad.

In Österreich is' just a so.
D' Bäurin scheißt Apflkoh.
Wann's na bald wieder schiß,
Daß ihr 's Loh z'riß.

Und i bin ja koan Inter-,
Koan Obersteirer.
Und i bin halt a lustiger
Österreicher.

Gestern bin i in Österreich gwen,
Heunt bin i da.
Bald i nia ba koan Diandl lag,
's Bluat stand mar a.