Wann i wissat, daß da Bua kam,
Tat i Tuttn waschn.
Und wann i wissat, dar a nit kam,
Tat i s dreckig lassn.

Wann i wissat, dass da Bua kam,
Tat i hoh aufbettn.
Und wann i wissat, dar a nit kam,
Tat is niedertretn.

Kimmst alleweil ban Tag daher,
Bei da Nacht nia.
Kimm bei dar Nacht ar amal
Schlafn bei mir.

Kimmt da Bua von da Weid
Und hat nit glei a Schneid,
Das Nachtl is kurz,
Er muaß glei wieder furt.

Lustig is schon,
Wann die Nachtigall singt,
Aba lustiger noh,
Bald mei rechter Bua kimmt.

Grüaß die Gott, Halterbua !
Bist ar amal da ?
Sitz di a weng nieder
Und rast a weng a.

Heunt auf d Nacht kimmst a weng,
Toa mar a weng hinter da Bänk
Zidernschlagn bei da Nacht,
Das war a Pracht.

Aha Bua, wegn den bist da ?
Hiazt woaß is scho.
Und i bild ma's schon ein,
Aba heunt kann's nit sein.

Bist gestern da gwesn,
Heunt a schon wieder.
Wannst alle Tag kimmst,
Wird's mar a schon zwider.

Hübscher Bua, feiner Bua,
Schwarzer Zigeunerbua,
Kauf mar a poar Bandtln a,
Hiazt war i da.

Schener Bua, liaber Bua,
Kemma muaßt überzua,
Kemma muaßt dann und wann,
D' Zeit wird ma lang.

Bist da, bist da, bist da,
Bist da, bist da, bist da,
Bist da, bist da, bist da,
Bist amal da.

Im Himmel steht a Weder,
Aba donnern tuat s nit.
Geh nar eina ban Fensa,
Aba dableibm derfst nit.

Du zaundürrer Bua,
Du moanst, du bist schen?
Bist a zaundürrer Stecka
Zan Wallfahrtn gehn.

Zwischn zwoa Tannabam
Wachst a greans Kraut.
I war gern lang beim Buam glegn,
Han mi nit traut.

Zum Zaun zuahi gschmissn
Hat mi oft schon oaner,
Aba übern Zaun drüber
Sei Lebtag koaner.

s Busserlgebn, s Busserlgebn
Is ja koa Sünd,
Das hat ma mei Muatter glern
Als a kloans Kind.

Bua, gib mar a Bussl
Und druck nur recht an.
Was zuckst denn, was gspürst denn ?
Er stemmt si erst an.

Auffigschaut, auffigschaut
Hat ar aufs Bett.
Abar auffitraut, auffitraut
Hat ar eahm nit.

Na boa, das tat i nit,
Hintern Bett lag i nit.
War dann das ar a Liegn
Hinterm Bett drin ?

Geh na weg von mein Fensa,
Geh na weg von mein Bett !
Mei Vader, der leidt ma
Koan Gasslbuam nit.

Zwischen meiner und deiner
Is 's Pfoaderl zrissn.
Leg di nit so glei zuaha,
Machst mar eina wischln.

D' Apferln san rosarot,
Einwendig faul.
D' Buam sand ar a so,
Guat is grad 's Maul.

Oanmal is koanmal,
Zwoamal is oanmal,
Dreimal is a nit viel,
Wann da Bua will.

Aus is, wia guat,
Wann man auslassn tuat !
Aba netta, wia siaß,
Wann man no weider einliaß !

Leg di nit so fest auffa !
Gib besser an Fried !
Sist kriagn mar a Wurzerl,
Was toan ma damit ?

Ziziwischperl, ziziwuschperl,
Zizihätscherl, mei Bua.
Heunt geht nix ba da Ratschariatschul,
's A-B-C-zerl is zua.