Landlerisch tanzn
Kan nit a ieder,
I kan's selber nit recht,
Aba meine Brüader.

Landlerisch tanzn
Und s'Gehn ba da Nacht,
Und das hat mi zan Toifl
So liaderla gmacht.

Landlarisch tanzn
Und s'Gadernschliafn,
Und das han i mein Diandl
Erst lerna müassn.

Ban landlerisch Tanz
Werdn d'Fensa staubig.
Und ban Hoamgehn auf' Nacht
D'Mentscha schwanger, glaub i.

Landlerisch, pinzgerisch,
Halsn, bald's finsa is.
Wann's na bald finsa war,
Daß ins neamd sah!

A landlerisch Gwandtl
Und an Steiermarikhuat.
Mit da Kellnerin tanzn,
Daß 's Geld schebern tuat.

Spielleut, spielts auf,
Laßts die Geigna singa !
Bald ma heunt koan Geld ham,
Werdn ma's moring bringa.

Spielleut, spielts auf,
Ös werds scho was kriagn.
I laß enk hiazt glei
An Häfn Erdäpfeln siadn.

Spielleits, spielts auf
Auf da mittlan Soatn,
Sist kann is mei Trampltier
Nit daloatn.

Spielleut, machts langsam auf!
I mag nit gfolgn.
I han an alts Küahstallmentsch,
Is voller Knolln.

Spielleut, ös Schwanz,
Machts mar auf meine Tanz !
Schauts ma nit so lang an,
Was i für an Schatz han.

Losts na grad d'Spielleut an,
Wia's musiziern !
I muaß selbm drüber lacha,
Mei Herz tuat si rührn.

Heunt is amal lustig,
Heunt is amal rar.
Heunt ham mar an Schütznmahl
Und an Tanz a.

Bin a lustiger Tänzer,
I tanz überall.
Und in Kaiser sein Saal
Tanz is ar no amal.

's Tanzn is lustig
Und 's Tanzn war rar
Und wann halt mei Geldbeutl
A Kälberkuah war.

Ös Buama, gehts tanzn,
Sist fressn enk d'Wanzn,
Sist fressn enk d'Fleh,
Es seidts eh nit weit he.

D'Kellnerin hat's Geld in Sack,
's Diandl d'Liab,
Und koa Kuchlmentsch mag is nit,
Sand ma weit z'gschmiert.

Zwicklstimpf, Bandtlschuah
Tragt da kloa Landtlbua.
Tragt da groß a schon oan,
Nit grad da kloan.

Aba hab di na, hab di na,
Hab di na stll !
Und wannst alleweil zablst,
Ham ma wieder koa Hüll.

Schen langsam und stad,
Wia ma d'Arwaß ansat,
Wia man Habern einlegt,
Hat si mei Diandl glegt.

Wia man Habern einlegt,
Hat si mei Diandl glegt.
Hat nit gschmutzt, hat nit glacht,
Wia's halt geht ba da Nacht.